भारतमा पाँच तले भवन ढल्दा ९० जनासम्म पुरिएको आशंका थप सामग्री

९ भदौ, २०७७

भारतको महाराष्ट्रमा पर्ने रायगढ जिल्लाको महाडमा सोमबार साँझ एउटा पाँच तले भवन ढल्दा ८० देखि ९० जनासम्म पुरिएको अनुमान छ।

त्यहाँबाट अहिलेसम्म आठ जनालाई निकालिएको छ। जसमध्ये एक जनाको मृत्यु भएको छ भने अरु सात जनाको उपचार स्थानीय अस्पतालमा भइरहेको छ। सो स्थान मुम्बईबाट १८० किलोमिटर टाढा पर्छ।

उक्त भवन हिजो साँझ ७ बजे ढलेको प्रहरीलाई उधृत गर्दै बीबीसी हिन्दीले जनाएको छ। भवन हापुस नामक तालको नजिक बनेको थियो। भवन एक दशक पुरानो थियो।

भवनमा ४५ देखि ४७ वटा फ्ल्याट थिए। भवन हल्लिन थालेपछि त्यहाँ बस्नेहरु भागेर बाहिर आएका थिए। स्थानीयका अनुसार भवन ढल्दा ठूलो आवाज आएको थियो, जसकारण उनीहरु डराएका थिए। त्यसपछि धूलोले आकाश ढाकेको थियो। त्यसको केहीबेरपछि उद्दारका लागि स्थानीय जुटेका थिए।

रायगढ जिल्ला प्रशासनले चार टीमलाई उद्दारमा खटाएको जनाएको छ। समाचार एजेन्सी एएनआईलाई उधृत गर्दै बीबीसी हिन्दीले जनाए अनुसार राष्ट्रिय आपत् प्रतिक्रिया बल (एनडीआरएफ) ले पनि आफ्नो छुट्टै समूह उद्दारका लागि खटाएको छ।

महाड औद्योगिक इलाका हो। यहाँ हरेक वर्ष भारी वर्षा हुन्छ। सन् २०१६ मा मुम्बई गोवा राजमार्गमा एउटा बेलायती शासनको बेलाको भवन ढल्दा पनि ठूलो क्षति भएको थियो।